學男人話齊 (轉貼)

但係久唔久你就會睇到呢類相，我唔知你吖，我睇到嗰時，真係何止磨拳擦掌，直頭想入廚房磨刀霍霍。

我由情竇初開嗰年已經同女朋友仔講：「我唔鍾意女人化妝，你咁樣咪幾好！」福大命大，換咗咁多任，位位都唔係化妝達人，亦唔係嗰啲日日都要化妝返工嘅悲慘OL。

黃子華話齋，你落咗妝我唔認得你，嗰啲叫「喬裝」。一個唔靚嘅人去扮靚係冇錯嘅，但係你扮索嚟引人追你，呢啲叫做詐騙，而家通街通fb都係化行裝嘅索女，簡直就係詐騙集團，一落咗妝，基本上就係同你玩緊「猜猜我是誰」。

好耐以前有個friend同我講過：「小心嗰啲戴烏蠅超嘅女人！」言下之意，就係烏蠅超可以遮咗好多%嘅醜，豬扒都變索女；而家仲過份，我女人逢親俾啲索女相我睇（我唔知點解佢有個咁嘅嗜好，定係想我答「邊夠你靚！」？）、問我「佢靚唔靚？」嗰陣，基本上我都必須答：「落咗妝先算啦！對大眼仔湯碗咁大！」

聽過一單仲過份，有對結咗婚嘅男女由相識嘅day 1開始，男人從來冇見過女人嘅真面目，講緊嘅係女人連瞓覺、上床都唔落妝。咁冇嘅有人肯娶咪得囉！但係，佢第時生仔，臨盆嗰陣會唔會都忍住陣補個妝先？

其實呢，男人就好衰嘅，女人最好就天生係靚女啦！天生唔靚，唔緊要，心地好都好sexy，試問一下，你化妝化到天仙咁靚，不過出到街又唔讓座俾大肚婆排隊打阿婆尖又踢啲流浪貓狗，咁個殼化到幾靚都冇用啦！

咁心地好又化唔化得妝？即係唔係咁好囉，次次出街都要等你化妝、返到嚟又要等你落妝，我哋去對面街超級市場買嘢咋喎！化咗妝有折嘅咩？

如果次次化完妝都好似整咗容咁，不如索性飛一轉韓國執一執啦！

順手隆埋胸喎記住。